Kapítalisminn er alvondur

Humm. Ef verðhjöðnun er slæm og verðbólga líka, er þá eitthvað eftir til að hrópa húrra fyrir? Hið óhefta markaðshagkerfi kapítalismans hefur aldrei virkað til lengri tíma án ríkisafskipta. Því miður eru þau afskipti alltaf miðuð við að bjarga kerfinu, ekki fólkinu. Það mun koma kreppa eftir þessa kreppu.

Vísbendingar um alvarlega verðhjöðnun í Bandaríkjunum

Solla stirða og Geir hinn ókúgaði

Lag: Nú er Gunna á nýju skónum. Síðasta lína fyrsta erindis fengin að láni frá Haraldi Bjarnasyni, fyrsta bloggara um fréttina.

Enn er Geir hinn ókúgaði
Icesave að fást við hít.
Samfylking í svartnættinu,
Solla í djúpum skít.

Solla stirða er stofuprýði,
stjörnurnar glampar á.
Kvensan leikur við kvurn sinn fingur
með kertin brún og blá.

Krötum er eitthvað órótt líka,
allir brokkandi.
Ilmurinn frá íhaldinu
er svo lokkandi.

Íhaldið í ógnarbasli
á með Davíð sinn.
Fljótur Geiri, finndu snöggvast
far í Evró inn.

Solla er enn í Alþinginu
eitthvað í pólitík.
Indælan skatt hún er að færa
til okkar í táknrænni flík.

Hátekjuskattur bara táknrænn

Áfram RÚV!

RÚV stendur fyrir Ríkisútvarpið, þ.e. útvarp allra landsmanna. Þetta er eina útvarpið í landinu, sem á skyldum að gegna við landsmenn, bæði hvað varðar menningartengt efni, dagskrárgerð og öryggisútsendingar. Þess vegna styð ég eftirfarandi:

1. Að tekinn verði upp nefskattur í stað afnotagjalds.
2. Að auglýsingar kringum barnaefni verði bannaðar.
3. Að banna innsetningu auglýsinga í þætti og vöruinnsetningu.

4. Að ofh-ið verði tekið aftan af Ríkisútvarpinu og það gert aftur að Ríkisútvarpinu.
5. Að núverandi útvarpsstjóri verði látinn fara.
6. Að RÚV taki afstöðu með fólkinu í landinu - gegn valdstjórninni.
7. Að RÚV fái aukin fjárframlög frá ríkinu.

Að öðru leyti en að framan greinir er ég andvígur því að RÚV sé gert að minnka auglýsingatíma sinn eins og frumvarpið gerir ráð fyrir - nema aðrar tekjur komi á móti og séu tryggðar.

Gjald vegna RÚV verður 17.900

Skrýtið

Í fyrsta lagi, þá er þessi "frétt" ekki af vef Apple. Kannski er þetta ekki-frétt:
Í öðru lagi, þá eru engir vírusar þekktir, sem virka á Mac OS X. Skv. apple.is umræðunum, þá eru þekkt örfá svokölluð "exploit", sem krefjast lykilorðs til að geta keyrt sig, þannig að þau eru í raun eins konar trójuhestar.

Apple leggur áherslu á vírusvarnir

Jesús og Jón

Aldrei hefði ég trúað því fyrir fram að Jón Sigurðsson væri Jesús Jósefsson endurborinn!

„Jesús fæddist 17. júní“

Óvinir lýðræðisins sitja í ríkisstjórnunum!

Forsætisráðherra Grikklands kyrjar svipaðan söng og starfsbróðir hans á Íslandi. Geir hinn ókúgaði kallar íslenska mótmælendur skríl en sá gríski kallar landa sína óvini lýðræðisins. Í báðum löndunum eru ríkisstjórnirnar rúnar trausti en neita að segja af sér. Í báðum löndunum sitja frjálshyggjuríkisstjórnir sjálftökuliðsins. Í öðru landinu hefur lögregla hinnar ríkjandi stéttar þegar drepið einn mótmælanda. Skyldi það eiga eftir að gerast hér?
Frjálshyggjuskríllinn í ríkisstjórninni er óvinur lýðræðisins, sama hvort er i Grikklandi eða á Íslandi.

Óvinir lýðræðisins

Þarf rökstuðning fyrir handtöku?

Margir spyrja núna þessarar spurningar í kjölfar þess að lögreglan handtók í dag flesta ef ekki alla þá, sem dirfðust að mótmæla á áhorfendapöllum Alþingishússins. Samkvæmt lögum, sem fasistaríkisstjórnin hefur keyrt í gegnum Alþingi verður lögreglunni einmitt heimilt að handtaka fólk án skýringa eftir að lögin taka gildi um næstu áramót. Svo virðist, því miður, að þó nokkrir bloggarar séu þessu framtaki löggjafans frekar eða mjög hlynntir. Þeir verða þá að sætta sig við ef óeirðalöggan/stormsveitin/fasistarnir ryðst inn á heimili þeirra um miðja nótt og fjarlægir einn eða fleiri úr fjölskyldunni án rökstuðnings eða dóms en örugglega ekki án fasistalaga. Það er enn þá vel innan við ein öld síðan fasistar komust til valda víða í Evrópu og allir ættu að þekkja hinar skelfilegu afleiðingar þess. Nú er ráðist að íhaldinu og þá er alltaf stutt í fasismann innan raða þess.

Við verðum að standa vörð um lýðræðið. Ekki gerir lögreglan það og þaðan af síður Alþingi þessa dagana. Við verðum að mótmæla handtökum á mótmælendum því að annars sitjum við uppi með fasismann áður en kratar sverja af sér tengslin.

Hefðum mátt ganga aðeins lengra.

Góðar tillögur hjá VG eins og við mátti búast. Þó hefði flokksráðsfundurinn mátt krefjast afnáms verðtryggingar. En hvað um það, hugmyndir VG eru miklu betri en hálfkák frjálshyggjuskrílsins í ríkisstjórninni.

Vilja þak á verðtryggð lán og frystingu uppboða

Manuals-in-PDF.com: Aðvörun

Mig vantaði bækling um ákveðna gerð flatskjár þannig að ég fór á vefinn, leitaði og fann - eða það taldi ég. Ég nýskráði mig inn á síðuna, pantaði bæklinginn og greiddi með VISA kortinu mínu gegnum PayPal. Allt svínvirkaði og mér var sagt að þetta gæti tekið nokkra tíma að fara í gegn. Í morgun var bæklingurinn klár í niðurhal og ég sótti hann en komst að því að hér var ekki sábæklingur á ferð, sem ég pantaði. Eftir að hafa grannskoðað pöntunina og sannfærst 100% um að mistökin lágu hjá síðunni en ekki mér sendi ég þeim póst og bað um leiðréttingu. Síðan hef ég sent þeim nokkra ítrekunarpósta, bæði gegnum síðuna og í tölvupósti. Ekkert svar. Þessir andskotar hafa haft af mér 9.99 dollara, sem er svo sem ekki stór upphæð en viðskiptahættirnir eru ekki í lagi. Þess vegna set ég þessa aðvörun hér inn ef vera kynni að aðrir þyrftu að leita sér að leiðbeiningabæklingum á vefnum. Síðan heitir manuals-in-pdf.com og ég ráðlegg öllum að láta hana alveg eiga sig.

Opið bréf til útvarpsstjóra

Eftirfarandi bréfkorn sendi ég útvarpsstjóra í tölvupósti rétt áðan og hvet aðra til að gera slíkt hið sama. Ef fólk vill nota sama orðalag er það velkomið.

"Ég undirritaður og einn af eigendum Ríkisútvarpsins, sem þér veitið forstöðu fyrir hönd þjóðarinnar, mótmæli því að þér hótið fyrrum fréttamanni RÚV málssókn fyrir það eitt að birta áður óbirt viðtal við Geir H. Haarde, forsætisráðherra 30% þjóðarinnar skv. skoðanakönnunum. Ég mótmæli því að fréttamaðurinn fyrrverandi sé þvingaður með þessum hætti að skila upptöku viðtalsins til RÚV og að biðjast afsökunar á að hafa birt viðtalið. Ég krefst þess að þér segið af yður sem útvarpsstjóri hið snarasta.

Björgvin R. Leifsson
[e-mail]"

Krafa um að viðtali við Geir verði skilað